Dag 14 – Wees hartlik lief vir mekaar
Dit sal vir almal wat die aftelkalender doen ‘n geskenk wees as jy ‘n foto van jou ervaring van die aftelkalender deel. Hoe doen ek dit?
Deur ons te “tag” op Facebook of Instagram: @bybelmedia
Oggendgebed
Begin jou dag met hierdie gebed.
Vader, dankie dat u genade elke oggend nuut is.
Lei my op u paaie en vul my hart met u liefde en blydskap.
Help my om ander te sien soos U hulle sien.
Vader, ek vra dat U elke besluit, elke reaksie,
elke poging en elke gesprek wat ek het,
sal seën tot u eer.
(Stilte)
Laat u wil geskied.
Amen
Voorbiddingstasie
Gebruik hierdie simbool om jou gebed te rig vir die dag.
Simbool: Koevert
Ons bid vir almal wat nie werk het nie, en vir almal wat bang is hulle verloor hulle werk.
Laat ons gewillig wees om te help waar ons mense in nood sien.
Oordenking
Lees hierdie teksuitleg vir die dag.
Bo alles moet julle mekaar hartlik liefhê, want die liefde bedek baie sondes – 1 Petrus 4:8.
As Christene moet ons mekaar hartlik liefhê omdat ons liefde vir mekaar dit vir ons moontlik maak om verby mekaar se tekortkomings te kyk. Christelike liefde is anders as romantiese liefde. Romantiese liefde word ontlok deur die een of ander positiewe eienskap van iemand. Iemand is vir ons mooi, aantreklik of aangenaam. Ons liefde is dan as’t ware ’n reaksie op dié mooi eienskap.
Ons liefde as lede van God se familie moet egter méér wees as bloot ’n reaksie op ander se bewonderenswaardige eienskappe. Dit moet ook ’n krag wees wat ander se tekortkomings aanvaar – oftewel bedek – en verander. Só was Christus vir ons lief ten spyte van wie ons was; Hy het ons liefgehad toe ons nog sondaars was. Sy liefde vir ons het ons ook nuutgemaak deurdat ons karakter en leefwyse deur sy liefde verander is om soos Syne te word.
Deur mekaar te aanvaar soos Christus ons aanvaar het, en deur mekaar lief te hê soos Jesus ons liefgehad het, word ons geloofsfamilie ’n plek waar mense op ’n positiewe manier aanvaar en vernuwe word. Dié dat Petrus ons aanmoedig om mekaar, bo alles, aanhoudend lief te hê.
Jesus, skenk aan my ’n liefde vir alle mense, ongeag wie hulle is. Laat u liefde hulle deur my liefde vernuwe soos u liefde my lewe vernuwe het. Amen.
Sakkie se sepie
Sien die gewone dinge wat jy in en om die huis doen as tekens van God se omgee.
Liturgie van die Lewe
Waarmee kies jy om jou tyd te vul?
Ek glo in hierdie grendeltyd (lockdown) of tyd van inperking het die meeste van ons ’n interessante ervaring van tyd. Dalk voel jy jy het te veel tyd omdat jy nie na al die gewone ekstra aktiwiteite kan rondjaag nie. Of dalk voel jy jy het te min tyd omdat jy nou jou kinders moet onderrig en hulle probeer besig hou terwyl jy ook nog jou werk van die huis af probeer doen. Miskien voel jy jy maak nie genoeg gebruik van die tyd om nou alles te doen en te leer wat almal op sosiale media sê hulle nou doen nie. Al daai tango-, kitaar- en baklesse … Want almal is mos besig om nuwe dinge te probeer. Of voel jy dat tyd in groot mate net opgehou bestaan het? Jy is nie seker wat die datum is of watter dag van die week dit is nie.
Ek het onlangs geluister na ’n podcast van ’n wêreldbekende huweliksterapeut, Esther Perel, wat met ’n paartjie oor die konflik in hulle huwelik gesels het. In ’n stadium verklaar die vrou redelik moedeloos dat tyd seker hulle seer sal genees. En Esther Perel val haar in die rede en sê hierdie woorde wat ’n baie groot indruk op my gemaak het:
“Tyd op sigself bestaan nie; dit gaan oor waarmee ons tyd vul.”
Met ander woorde, tyd self het nie enige waarde nie; dit gaan oor wat binne die beskikbare tyd gebeur. Tyd kry die betekenis wat ons daaraan gee. Gaan sit vandag ’n paar minute saam met jou huismense en dink oor die tyd van die jaar. Dit is Paasfees. Dink oor wat Paasfees, Jesus se kruisdood en sy opstanding juis in hierdie tyd vir ons kan beteken. Maak tyd om te onthou: God gee ons ’n nuwe lewe, vandag.
Kinderaktiwiteit
Pret vir jou en jou kinders.
Sjoe! 21 dae van afsondering. 21 dae waarin ons eintlik net in ons huise (of tuine) mag wees en net vir die nodigste dinge soos kos of mediese behandeling mag uitgaan. Dit kan nogal ’n rowwe tyd wees. Al die dinge wat normaalweg in ’n dag gebeur, soos skool, sport en eredienste, gebeur nou nie meer nie. Dit kan ’n mens deurmekaar maak en ook verveeld laat voel. Hierdie dagstukkies sal ons help om steeds elke dag op ’n kreatiewe en lekker manier tyd saam met Jesus deur te bring. Jy kan hierdie dagstukkie op jou eie doen, saam met jou boeties of sussies, of sommer saam met jou hele huisgesin. Vra een van die grootmense in die huis om elke dag jou aktiwiteit op Facebook te deel sodat almal dit saam met jou kan geniet. Merk dit met #afsonderingskalender
———————————
’n Mens kry verskillende soorte liefde. Daar is romantiese liefde, soos die liefde tussen twee mense wat verlief is op mekaar. Dan is daar die liefde wat ’n mens vir ’n troeteldier het, wat weer heeltemal anders is. Die liefde wat Jesus se volgelinge vir ander mense moet hê, lyk ook heeltemal anders as ander soorte liefde, want ons volg Jesus se voorbeeld van die liefde. Jesus is lief vir ons, maak nie saak wie ons is of wat ons doen nie. Dit is die soort liefde wat ons vir ander mense moet hê
Kan jy nog voorbeelde van verskillende soorte liefde noem?
Paasfees is om die draai. Hoe het Jesus vir ons sy liefde gewys tydens die Paasgebeure?
Aktiwiteit
Leer 1 Petrus 4:8 uit jou kop. Dink bewegings uit om by die vers se woorde te pas.
Kies ’n plekkie in julle huis en bou Jesus se kruistoneel daar. Jy kan in ’n Kinderbybel gaan loer vir idees of vra iemand om jou op die internet te help soek na idees.
Kreatiewe gebed
INSTRUKSIES
• Kies jou kunsmateriaal, soos kleurpotlode, kleurpenne en koki’s. Enige van hierdie materiale kan werk.
• Kleur die prent in en doen die aktiwiteit.
WENKE
• Kies nie meer as vyf kleure nie. As jy onseker is oor watter kleure om te gebruik, haal al die kleure uit en pak dit op die tafel. Maak jou oë toe en tel vyf op.
• Dit sal dalk vir jou makliker wees as jy die groot spasies eers nie inkleur nie, of net die rande daarvan inkleur.
• Moenie halfpad ophou nie, veral nie as die rede hiervoor is dat jy dink jou prent lyk lelik nie. Dit is juis die doel van die oefening – om jou aandag weg te trek van onnodige gedagtes soos “Doen ek dit reg?” en jou aandag eerder te fokus op die mense vir wie jy lief is.
• Wanneer jy die prent klaar ingekleur het, sit die prent neer op ’n prominente plek in die huis, soos in jou kamer of teen die kombuismuur.
Oorweeg dit om jou prent op sosiale media te deel en te merk met #afsonderingskalender #saamkerk
Dankies en getuienisse
Dit sal vir almal wat die aftelkalender doen ‘n geskenk wees as jy ‘n foto van jou ervaring van die aftelkalender deel. Hoe doen ek dit?
Deur ons te “tag” op Facebook of Instagram: @bybelmedia
Gister se getuienisse:
Ons volg hierdie aftelkalender al van dag 1 af. Dit hou ons geanker en help met ons roetine elke dag. Ons kinders van 9 en 11 jaar oud is gek oor die program. Dankie hiervoor!– Juliette le Roux
Deel jou getuienis met ons. Gebruik die aanlynvorm onder.
Slaaptydstorie
Slaaptydstorie deur storieman Ewald van Rensberg.