Dag 18 – Aanbid God saam
Dit sal vir almal wat die aftelkalender doen ‘n geskenk wees as jy ‘n foto van jou ervaring van die aftelkalender deel. Hoe doen ek dit?
Deur ons te “tag” op Facebook of Instagram: @bybelmedia
Oggendgebed
Begin jou dag met hierdie gebed.
Daar is niemand soos U nie, Here.
U is wonderbaarlik in elke opsig.
Ek staan vandag in u teenwoordigheid,
en laat u Heilige Gees my hart en siel deurdrenk.
U liefde laat my sprakeloos.
U les my dors.
Ek buig voor U.
Ek hef my oë op na U en vind skuiling in u teenwoordigheid.
Maak my oë en ore oop, Here,
sodat ek sal ontvang wat ek glo.
(Stilte)
Laat u wil geskied.
Amen.
Voorbiddingstasie
Gebruik hierdie simbool om jou gebed te rig vir die dag.
Simbool: Koerant
Ons bid vir ondernemings en vir maatskappye wat onder finansiële druk is en moeilike besluite oor die pad vorentoe moet neem.
Ons bid vir God se leiding en wysheid in hierdie beproewende tyd.
Oordenking
Lees hierdie teksuitleg vir die dag.
Sing onder mekaar psalms, lofgesange en ander geestelike liedere; sing met julle hele hart tot eer van die Here. Dank God die Vader altyd oor alles in die Naam van ons Here Jesus Christus – Efesiërs 5:19-20.Om God saam te kan aanbid is een van die grootste voorregte van deelwees van God se geloofsfamilie. Dié dat Paulus die gemeente in Efese oproep om saam psalms, lofgesange en ander geestelike liedere te sing, tot opbou van mekaar en tot eer van God. Om God saam te aanbid het volgens Paulus ’n dubbele funksie. Eerstens loof dit God vir wie Hy is en vir wat Hy vir ons as sy kinders doen. In dié sin is die doel van aanbidding om die Here te loof en sy Naam groot te maak. Daarom moet ons God ons Vader altyd bedank vir alles – en spesifiek ons verlossing – in die Naam van Jesus. Ons gesamentlike aanbidding van God het egter ook ’n tweede funksie. In ons liedere bely ons teenoor mekaar wat ons oor God glo. Deur saam te sing versterk ons mekaar se geloof. Ons aanbidding is dus ’n gesamentlike geloofsbelydenis. Daarom is dit belangrik dat ons sal let op die woorde van die liedere wat ons sing, en dat ons dit met ons hele hart sal saamsing.
Vader, dankie vir die voorreg om U te kan aanbid met musiek en sang. Mag die liedere wat ons sing u Naam groot maak en ons geloof in U versterk. Amen.
Sakkie se sepie
Sien die gewone dinge wat jy in en om die huis doen as tekens van God se omgee.
Liturgie van die Lewe
Nuwe wêreld op die Maandag
Die graf is oop. God het opgestaan. Dit is ’n nuwe wêreld.
Ons bevind ons beslis ook nou in ’n nuwe wêreld. In die afgelope paar weke se grendeltyd het ek tot die intense en diep besef gekom van hoeveel ek het. In skreiende kontras met hoe min ander het.
Elizabeth Ann Seton het gesê: “Live simply so that others may simply live.” Noudat ons elkeen vir ’n tyd lank ervaar het dat ons nié elke dag of naweek winkel toe hoef te ry om goed te koop nie – dat ons eintlik genoeg het – wil ek jou nooi om saam te dink oor die paar maande wat nou voorlê.
Daar is groot hoeveelhede mense oor die wêreld heen wie se inkomste en leefwyse dramaties geraak is deur die lockdown- of grendelbevele. Miljoene mense se besteebare inkomste het opgedroog of verdwyn. Die mense wat oor die wêreld heen die swaarste deur die gebeure van die twee laaste maande getref word, is die armste mense rondom ons.
Ek wil jou in die laaste week van afsondering nooi om saam met jou huismense deur julle huis te gaan en te kyk na alles wat julle besit. Dan wil ek julle nooi om vanuit julle oorvloed goeie, bruikbare items te kies wat julle self nog sou kon gebruik, maar wat julle nie só nodig het nie. Verskeie plaaslike owerhede en munisipaliteite het reeds afsetpunte geïdentifiseer waar voedsel en items afgelaai kan word, wat dan geskenk sal word aan mense wat dit nodig het. Kyk in die plaaslike media of op jou munisipaliteit se sosialemediabladsye waar hierdie items afgelewer kan word.
Ek glo werklik dat ons nie deur hierdie tyd kan beweeg sonder om anders anderkant uit te kom of anders op te tree nie.
Kinderaktiwiteit
Pret vir jou en jou kinders.
Sjoe! 21 dae van afsondering. 21 dae waarin ons eintlik net in ons huise (of tuine) mag wees en net vir die nodigste dinge soos kos of mediese behandeling mag uitgaan. Dit kan nogal ’n rowwe tyd wees. Al die dinge wat normaalweg in ’n dag gebeur, soos skool, sport en eredienste, gebeur nou nie meer nie. Dit kan ’n mens deurmekaar maak en ook verveeld laat voel. Hierdie dagstukkies sal ons help om steeds elke dag op ’n kreatiewe en lekker manier tyd saam met Jesus deur te bring. Jy kan hierdie dagstukkie op jou eie doen, saam met jou boeties of sussies, of sommer saam met jou hele huisgesin. Vra een van die grootmense in die huis om elke dag jou aktiwiteit op Facebook te deel sodat almal dit saam met jou kan geniet. Merk dit met #afsonderingskalender
———————————
Die paar dae nadat Jesus uit die graf opgestaan het, was ’n vreemde tyd. Mense het nie lekker verstaan wat gebeur het nie. Maar een ding is seker: Jesus leef! Hy het opgestaan! En ons loof en prys Hom! Wanneer ons Jesus saam loof en prys, maak ons Jesus se Naam groot en ons help mekaar om sterk te bly in ons geloof, want ons herinner mekaar aan wie Jesus is.
Wat is jou gunsteling Jesusliedjie en hoekom?
Aan watter woorde kan jy dink om te beskryf wie Jesus is en wat Hy vir jou doen?
Aktiwiteit
Kyk of julle ’n paar musiekinstrumente kan maak om Jesus mee te loof en prys.
Gebruik daardie instrumente en sing ’n paar liedjies saam om Jesus te loof en prys.
Kreatiewe gebed
INSTRUKSIES
• Kies jou kunsmateriaal, soos kleurpotlode, kleurpenne en koki’s. Enige van hierdie materiale kan werk.
• Kleur die prent in en doen die aktiwiteit.
WENKE
• Kies nie meer as vyf kleure nie. As jy onseker is oor watter kleure om te gebruik, haal al die kleure uit en pak dit op die tafel. Maak jou oë toe en tel vyf op.
• Dit sal dalk vir jou makliker wees as jy die groot spasies eers nie inkleur nie, of net die rande daarvan inkleur.
• Moenie halfpad ophou nie, veral nie as die rede hiervoor is dat jy dink jou prent lyk lelik nie. Dit is juis die doel van die oefening – om jou aandag weg te trek van onnodige gedagtes soos “Doen ek dit reg?” en jou aandag eerder te fokus op die mense vir wie jy lief is.
• Wanneer jy die prent klaar ingekleur het, sit die prent neer op ’n prominente plek in die huis, soos in jou kamer of teen die kombuismuur.
Oorweeg dit om jou prent op sosiale media te deel en te merk met #afsonderingskalender #saamkerk
Dankies en getuienisse
Dit sal vir almal wat die aftelkalender doen ‘n geskenk wees as jy ‘n foto van jou ervaring van die aftelkalender deel. Hoe doen ek dit?
Deur ons te “tag” op Facebook of Instagram: @bybelmedia
Deel jou getuienis met ons. Gebruik die aanlynvorm onder.
Slaaptydstorie
Slaaptydstorie deur storieman Ewald van Rensberg.